Nau mai, haere mai ki Ngā Taiātea Wharekura

Kia rere arorangi ngā mihi ki te Atua kia māturuturu te tōmairangi o tōna atawhai ki runga i a tātou i tēnei rā, ā, haere nei te wā. E whakaaro nui ana ki a rātou mā kua kapohia e te ringa o Aituā, moe mai rā, moe mai rā, okioki mai rā. Kia whakahōnoretia tō tātou Arikinui Kuini Nga wai hono i te po e noho mai rā i runga i te ahurewa tapu i whakarerea iho ai e tōna pāpā, e ōna tūpuna. Ki te Kāhui Ariki, ki te Whare o Pōtatau, Paimārire ki a rātou. Kei ngā reo, kei ngā mana, kei ngā karangatanga maha o Tainui waka, tae atu ki a tātou katoa nō ngā mātāwaka, nō ngā hau e whā o te motu, tēnā rā tātou katoa. 

Tēnei te whakamānawa atu nei ki a koutou katoa e whakapono ana ki te kaupapa mana Māori motuhake, koutou e ū ana ki ngā uaratanga o te kaupapa, e renarena ai ngā taukaea tāngata, kāore e ārikarika ngā mihi ki a koutou katoa. He wāhi taupoki kore tēnei, he wāhi whakapono ki te pitomata o ngā uri tēnei, he wāhi angitu hoki tēnei. Kia manawa tahi tātou kia pai ai te tiaki i te kaupapa, kia eke panuku ai ngā uri ki te tihi o angitu. 

Nau mai, piki mai ki runga i te waka o Taiātea kia hoe tahi ai tātou katoa.

Nāku, i roto i ngā mihi nui o te wā,

Michelle Treadaway-Ohia  – Tumuaki 
Ngāti Kahungunu | Rongomaiwahine | Ngāi Pākehā